【Emily】鄭家富「生日禮物」：神學博士課程取錄信

【明報專訊】民主黨前成員鄭家富（圖）近年幾乎絕迹政壇，近日佢喺社交平台透露，今年生日除咗收到大家祝福，仲收到英國Durham University嘅通知，取錄佢修讀該校嘅神學博士學位。作為虔誠天主教徒，鄭家富當然好開心，佢話Durham喺神學研究嘅世界排名第6，希望自己喺人生嘅另一跑道繼續服務社會。

2010年民主黨同中央達成政改方案，唔同意方案嘅鄭家富同年退黨，2012年立法會議員任期結束後，佢話唔再參選。直至2016年，鄭家富「復出」參選立法會選舉新東選區，3個新民主同盟成員為佢站台拉票捱批後退黨，最終鄭家富無當選，自此鮮有喺政壇現身。

睇番律師會網頁資料，本身係律師嘅鄭家富仲係一間律師樓嘅合伙人。