【Emily】迪士尼漫威巡遊 近距見美國隊長蜘蛛俠

【明報專訊】今日開始內地五一黃金周假期，香港迪士尼樂園由噚日起至到6月22號，推出全新嘅「漫威超級英雄匯」巡遊，畀大家近距離同鐵甲奇俠、美國隊長、黑寡婦、雷神、蜘蛛俠等多位漫威超級英雄見面。樂園亦設影相環節，畀一眾漫威迷盡情打卡。巡遊每日舉行，演出嘅時間可以透過迪士尼官網或官方嘅手機程式睇番，表演長約30分鐘。

Emily噚日去現場睇過，見到唔少人喺漫威英雄出場時都大聲歡呼，仲聽到有人大叫「I love Spider-Man（我愛蜘蛛俠）」。好多人亦拎起手機影相同錄影，又同一眾漫威超級英雄近距離打招呼，氣氛相當熱烈。迪士尼除咗有全新嘅巡遊，亦會推出多款漫威主題嘅飾物同服裝等，仲會推出全新嘅漫威主題美食，等大家全情投入漫威世界。