【Emily】港大學會今舉辦 獲邀人工島論壇 發展局：受邀者因事缺席

【明報專訊】發展局噚日公布咗交椅洲人工島「公眾參與」活動結果，而港大學生會社會科學學會今日中午12點將舉辦「明日大嶼．香港未來？」論壇，探討人工島項目對香港長遠發展嘅利益，以及當中可能出現嘅危機，並邀請唔同陣營嘅嘉賓出席。Emily聽聞，港大原本有邀請發展局官員，但最終發展局常秘（規劃及地政）何珮玲同局長甯漢豪都唔會出席。

據Emily了解，主辦單位除邀請民間團體出席外，本身邀請發展局常秘出席，被拒後就嘗試聯絡局長，結果二人都唔出席。發展局回覆查詢話，該局早前已經回覆港大社會科學學會，受邀者因事未能出席，並會繼續因應研究進展，採用適合嘅公眾參與形式收集公眾意見。

劉國勳本研社出席 談正反理據

有興趣嘅市民今日可以親身去論壇，或者透過網上直播觀看，屆時會有兩邊陣營嘅代表出席，包括曾發表報告要求煞停項目嘅本土研究社成員黃肇鴻，同埋支持項目兼呼籲要盡快上馬嘅民建聯議員、立法會發展事務委員會副主席劉國勳，分別講述反對及支持嘅理據，唔知道雙方到時會唔會擦出火花呢？