【Emily】黃偉綸：做記者可享中產生活 如問責官

【明報專訊】由香港恒生大學舉辦嘅「第七屆恒大商業新聞獎」噚日舉行頒獎禮，副財政司長黃偉綸致辭時寄語記者，如果努力工作，前途將會理想，「（做記者）會唔會大富大貴？就唔會嘅。同做問責官員一樣，你都係有合理中產生活水平㗎啫」。佢並點名台下多名傳媒高層，「（佢哋）全部唔係身光頸靚、穿金戴銀，但都係好健康、好合理、有尊嚴嘅生活」。Emily留意到，傳媒同業隨即對副司長嘅說法議論紛紛，有人提到政治助理最低人工有7萬多元，同唔少記者嘅人工相差一截。

話初時刻苦 努力做前途幾好

曾任新聞處長嘅黃偉綸話，記者決定入行係正確選擇，雖然初時「待遇比較刻苦啲」，但認為商業新聞係好好嘅「鍛煉場」，將來留喺新聞業或轉職傳訊公關發展前景均理想。「如果有啲人同你講，做記者好慘，唔好信佢，你努力做，前途會幾好。」黃偉綸又鼓勵未能獲獎嘅記者，話有時香港小姐三甲未必係發展最好，認為新聞最重要係參與。