【Emily】狄志遠擬辦傷健遊行 如掛牌寧取消 稱警反應正面 願心口貼貼紙識別

【明報專訊】原擬五一勞動節前或當日舉行集會遊行嘅團體，已先後撤銷申請，新思維社福界議員狄志遠噚日透露，計劃最快下月底舉辦遊行，爭取成立殘疾人士委員會，預計有100人參加。佢同Emily講，初步已同警方溝通過，對方反應正面，但未傾細節。狄志遠講到明，參加者願意喺手臂綁絲帶、心口貼貼紙做識別，但如果好似之前嘅遊行咁，參加者要掛有號碼嘅頸牌，佢就寧願取消遊行。

狄志遠仲話，如果警方要求參加者唔可以戴口罩，就唔多合理，因為唔少參加者係傷健人士，唔戴口罩有健康風險，希望警方唔好設呢個限制。

將軍澳開地辦鋪路區選

另外，新思維喺將軍澳寶林邨開辦事處，由本身係旅遊促進會總幹事、近日不時為訪港旅行團受訪嘅副主席崔定邦做辦事處總幹事，狄志遠明言，開地辦係為今年11月可能舉行嘅區議會選舉鋪路，另一目標「選區」就係油尖旺。至於係咪會由崔定邦出選，崔定邦就不置可否，只係話自己工作已經好忙。

狄志遠仲搵埋前民主黨北區區議員莫兆麟「出山」幫手搞地辦，不過莫兆麟講明唔係入黨，而自己仲有份正職，今次係純粹幫手。