【Emily】中大民調：「青年向上流機會」睇法好轉

【明報專訊】中大香港亞太研究所上個月打電話訪問717人，調查結果顯示唔少人對於青年向上流動嘅睇法比上年正面，其中有48.5%受訪者覺得，本港青年向上流動機會較10年前變差，45.5%覺得青年向上流動嘅機會唔夠，而同上年同期同類型調查嘅數據比較，兩者分別減少14.8個百分點同6.6個百分點。

調查仲問咗受訪者點理解「向上流動」，結果最多人認為係「改善生活質素」（38.2%），其後依次係「增加財富及發展事業」（31%）、「增長教育知識水平」（14.8%）、「增加對社會影響力」（5.6%）。

至於去內地或外國發展會唔會較留港有更大機會成功，21.6%受訪者就認為去內地發展比留港有較大機會成功，17.9%覺得去外國發展比留港有較大機會成功，兩個結果都比舊年上升超過兩個百分點，但升幅唔算顯著。