【Emily】孫玉菡考察灣區 了解大數據護老

【明報專訊】近日政府高官接連離港外訪，其中同社福界去大灣區考察嘅勞工及福利局長孫玉菡噚日行程緊湊，就養老同埋殘疾服務考察，今日下晝就會返香港。

根據勞福局facebook，孫玉菡分別去咗參觀養老服務綜合示範平台同養老院，了解對方點用大數據監察同回應長者所需，仲拜訪咗喺當地養老嘅港人。孫又去咗同殘疾人士有關嘅康復、輔具中心睇睇運作，又同殘疾幼兒見面，仲試坐咗兩款唔同類型嘅輪椅體驗。

蔡若蓮到重慶訪港生

同樣正外出考察嘅教育局長蔡若蓮，繼續同教育界喺重慶，噚日佢到訪咗重慶市港澳辦等機構，仲去咗有逾百個香港學生就讀嘅四川美術學院，了解人家點樣推行藝術創作，又趁機同學生代表見面交流，了解佢哋喺當地升學同生活嘅情况。蔡若蓮周五（28日）會返香港。