【Emily】姚柏良倡回鄉證過期一年內可過關

【明報專訊】內地同香港因應新冠疫情封關約3年，今年2月先恢復通關，唔少人嘅回鄉證早已過期，中旅社網站嘅網上預約安排亦不時爆滿。為疏導呢個情况，立法會旅遊界議員姚柏良出席另一議員鄧家彪嘅網台節目時就建議，畀回鄉證過期一年內嘅市民可以繼續正常出入境，仲話已經同內地有關部門反映咗。

姚柏良解釋，疫情3年間，唔少人因為唔知幾時通關，所以冇計劃去換回鄉證。佢話港府喺2月突然宣布通關，大家都措手不及，為趕去內地探親同處理唔同事務，於是走去續證。佢仲話，估計3年幾以來累積要換證嘅人數有100萬以上，而中旅社辦證中心一日最多只可以處理五六千宗申請，如果用一個月工作26日去計，辦證中心起碼要花半年以上先可以完成100萬宗申請。

姚柏良仲提到，?家陸續都有人過期換證，換領人數不停累積，即使喺內地換證都唔容易，同樣有額滿情况，加上暑假將至，希望可於短時間內解決問題。