Emily Online︳首屆「九龍東賽艇節」觀塘海濱舉行　何永賢搭擋余寶美拎政府女子雙人艇賽冠軍 (13:25)

由香港藝土民間有限公司同中國香港賽艇協會合辦嘅第一屆「九龍東賽艇節」今日舉行。賽艇節會舉行18場平板賽艇賽事，其中房屋局長何永賢同屋宇署長余寶美搭擋，參加政府部門組嘅女子雙人艇500米賽事，以4分47秒嘅成績，喺兩組參賽隊伍之間拎到冠軍。

何永賢賽前話好開心可以參加比賽，透露自己同拍檔每朝早都會去海濱練習，持續咗兩個星期，又話雙人划艇嘅難度在於要合拍、合節奏，目標係今日可以喺比賽中成功做到教練教嘅動作，仲話自己由噚晚到今朝都喺心入面諗下啲動作要點做。

曾經做過「起動九龍東」副專員嘅何永賢又話，觀塘海濱以前冇咩生氣：路邊泊滿貨車、冇咩行人，天橋底被圍封，仲放置好多廢紙廢鐵；?家就唔同晒，環境好靚之餘仲成日舉辦活動，佢仲推薦其中一間咖啡店嘅咖啡，話每次練習划艇之後都會飲返杯。

「九龍東賽艇節」喺觀塘避風塘及觀塘海濱「VESSEL發現號01」舉行，除咗平板賽艇賽事，仲有「VR虛擬實境賽艇體驗」、「1分鐘賽艇挑戰」、「平板賽艇模擬體驗」、「龍舟機及獨木舟機體驗」等活動。