【Emily】6議員無去灣區團 狄志遠抵倫敦備戰 大肚林琳訪九巴廠

【明報專訊】立法會大部分議員去咗大灣區考察，有6名議員因唔同原因無去到，其中新思維狄志遠去咗英國倫敦準備今日舉行嘅馬拉松。狄志遠提早去到當地，都有輕鬆練跑（圖）、逛公園，話當地公園嘅花和樹讓佢平靜下來。佢話為咗今次賽事已準備咗大半年，但仍覺得練習時間不足，加上預計今日天氣7℃至11℃，降雨機率90%，「挑戰不能說不大」，不過同時話讓風吹，任雨走，咁就係人生。

至於民建聯林琳，因為大肚唔方便北上，只能喺社交媒體轉發交流團資訊，話希望大家成果滿滿咁返嚟。佢喺香港都有出席活動，上周六去咗做「巴膠」，到九巴沙田車廠參與九巴90周年嘉年華。考察原有85人報名，除咗早已告假嘅狄志遠、林琳、林順潮，民建聯黃英豪、選委界別陳曼琪、地產建造界龍漢標昨均未有現身。