【Emily】首屆九龍東賽艇節 何永賢伙余寶美 兩隊中奪冠

【明報專訊】全港首個平板賽艇比賽噚日喺觀塘避風塘及觀塘海濱舉行，吸引咗79人參加，其中房屋局長何永賢同屋宇署長余寶美搭檔，參加政府部門組嘅女子雙人艇500米賽事，以4分47秒嘅成績，喺只得兩組參賽隊伍中拎到冠軍。

設「VR虛擬實境賽艇體驗」

第一屆「九龍東賽艇節」由香港藝土民間有限公司同中國香港賽艇協會合辦，搞咗18場平板賽艇賽事，除咗平板賽艇賽事，仲有「VR虛擬實境賽艇體驗」、「1分鐘賽艇挑戰」、「平板賽艇模擬體驗」、「龍舟機及獨木舟機體驗」等活動。

何永賢賽前話好開心可以參賽，自己同余寶美練習咗兩個周日嘅朝早，上周先同拍檔開始試雙人划艇。佢話雙人划艇嘅難度在於要合拍、合節奏，希望成功做到教練教嘅動作。

做過「起動九龍東」副專員嘅何永賢又話，觀塘海濱以前冇咩生氣，路邊泊滿貨車、冇咩行人；天橋底被圍封，仲放咗好多建築物料；?家唔同晒，環境靚之餘仲成日搞活動，佢仲推薦其中一間咖啡店嘅咖啡，話每次練完划艇都會飲番杯。