【Emily】「虛擬凡爾賽宮」展 踩住單車睇靚景

【明報專訊】全球首個及唯一官方以世界文化遺產凡爾賽宮為主題嘅巡迴展覽「虛擬凡爾賽宮之旅」，噚日喺香港文化博物館舉行開幕禮。展覽分6個主題，其中喺「凡爾賽宮之自然景觀」展區，市民可以踏住單車互動裝置，漫遊凡爾賽宮嘅王家園林，欣賞法式花園、特里亞農宮花園等；而喺「凡爾賽宮之輝煌璀璨」展區，市民可透過360度全景影像，欣賞凡爾賽宮最著名嘅宮室，例如鏡廳、皇家歌劇院等。

展覽除咗有影像外，市民仲可以聽到由高科技合成、模擬路易十四聲音嘅歡迎詞；又可以聞到法國著名調香大師弗朗西斯．庫爾吉安為凡爾賽宮調製、以路易十四最愛嘅橙花為基調、名為「王家喜悅」嘅獨特香氣。

展期即日起至7月9號，成人標準票價10元，小童、全日制學生、殘疾人士及60歲以上長者半價，持有博物館通行證者可免費入場。