【Emily】恭喜得獎者 楊潤雄金像獎不忘集郵

【明報專訊】第41屆香港電影金像獎頒獎禮前晚舉行，《給十九歲的我》奪最佳電影，電影聯合導演郭偉倫「拍咗先算，剪咗先算，上咗先算」感言引發唔少關注。文體旅局長楊潤雄都有出席頒獎禮，並喺facebook出帖同上載相片，佢喺場外搵咗唔少演員同幕後人員合照，話衷心恭賀所有得獎者、感謝所有電影從業員不斷努力追求卓越，「打造一部又一部廣受觀眾歡迎的電影」，以電影「說好香港故事，展現香港獨特的文化魅力」。楊局長特別提到，胡楓獲頒「終身成就獎」、資深影評人羅卡及石琪獲頒「專業精神獎」，形容佢哋係電影界後輩嘅學習典範。

喺立法會財委會噚日嘅特別會議，唔少議員關注政府喺支持香港電影嘅角色，其中民建聯林琳話有業界反映，由電影發展局同藝發局資助嘅電影，「幾多嘅都係推廣負面同埋暗黑層面議題」，質疑係宣揚負面情緒，問政府點樣「說好香港故事」。楊局長就答話香港本身係多元文化，只要唔涉及犯法、犯國安法、反國家行為或信息，有時都會係用一個開放嘅態度去睇。新民黨葉劉淑儀建議政府資助電影時，加入提升愛國情懷做評分因素，楊話會考慮。

相關字詞﹕給十九歲的我 楊潤雄 電影金像獎