【Emily】故宮第100萬名訪客獲贈展覽圖錄

【明報專訊】位於西九文化區嘅香港故宮文化博物館去年7月3日開幕，噚日終於錄得100萬人次訪客參觀，館長吳志華特別準備咗特別展覽「百樣玲瓏——卡地亞與女性」圖錄送畀第100萬名訪客。呢本圖錄嘅展覽上周起舉辦，至今年8月中結束，展出約300件由19世紀至今嘅卡地亞珠寶、鐘表、珍寶及文獻，而展覽圖錄上面，就有由借出展品嘅演員林青霞、劉嘉玲，以及全國政協常委何超瓊嘅親筆簽名。

吳志華話，能夠喺開館不足10個月接待第100萬名訪客，覺得鼓舞，亦感謝公眾對博物館嘅支持，之後會繼續策劃具香港特色及世界級水平嘅展覽和教育活動，弘揚中華優秀傳統文化，倡導唔同文明嘅對話同交流，做到融貫中外、匯通古今。

相關字詞﹕香港故宮文化博物館