【Emily】人員考慮影相效果 議廳「立」字失蹤

【明報專訊】港澳辦主任夏寶龍到香港考察，政總高層以至立法會都配合。夏寶龍前日（周日）去到立法會，歷史性坐喺會議廳中央位置同議員交流，據Emily了解，夏寶龍當時同特首李家超、中聯辦主任鄭雁雄等人一字排開坐喺議事廳嘅主席台前，一眾議員坐番平時個位。睇番當晚嘅會面影片，有人發現喺主席台，象徵立法會嘅「立」字標誌唔見咗；而睇番立法會上次開大會，即係3月29日時，個標誌仍「立」足主席台。

據消息人士話，夏寶龍到訪立法會前，工作人員曾經試位影相，有人以主任個頭後面有個「立」字、影像效果唔好為由，做咗改動。Emily所知，呢個「立」字聽日復會就可以重見天日。

特首陪考察 行會今「讓路」

另外，夏寶龍一連6日訪港，今日嚟到最後一日，其間李家超幾乎全程陪伴在側，原定逢周二舉行嘅行政會議例會，今日都要「讓路」。政府噚日發稿公布，因應夏寶龍正馬不停蹄考察香港情况，李家超全力支持並作最佳安排及參與，以確保一切順暢，今日嘅行會例會延至下周二（25日）舉行。其實上星期行政會議都按照慣例，喺復活節假期翌日休會，即係話行會會連續兩個星期無開會。

相關字詞﹕立法會 夏寶龍