【Emily】兩月前浴室跌傷 林素蔚抱恙入院

【明報專訊】立法會「A4聯盟」議員林素蔚Connie都算黑仔，佢噚日喺社交媒體出帖話自己入咗醫院，原因係身體抱恙，持續一段時間個胃唔舒服，相片見到佢要臥牀「吊鹽水」（圖）。佢話暫時返唔到立法會做嘢，要各同事及工作伙伴擔心，實在抱歉。佢又叮囑大家保重身體，話近期唔少人都中流感，提醒大家健康無價。Connie今年2月都整傷過身體，當時喺屋企浴室跣倒撞傷，起初以為小事，其後背脊、頸都開始痛，要睇中醫，佢形容自己「犯太歲」。

Connie出帖後，唔少政界朋友送上慰問。民青局長麥美娟就祝Connie早日康復；其他各黨派議員如工聯會陸頌雄、新民黨容海恩、民建聯李世榮、選委界別江玉歡等都紛紛送上問候。

相關字詞﹕林素蔚