【Emily】國民在港屢遇搶劫 日總領館籲提防 有人尖沙嘴行街 賊坐車搶手袋

【明報專訊】警方早前公布，今年首兩個月錄得嘅盜竊案按年升咗37%，日本駐港總領事館噚日都發出呼籲，話接獲多宗日本人喺香港被搶劫嘅舉報，仲舉咗兩個案例，都係喺尖沙嘴發生，其中一單係舉報人被後方駛近嘅車上嘅人搶手袋，另一單係舉報人畀人從後突襲，伸手入背囊偷嘢，好彩最終事敗。

籲手袋勿向馬路 行路咪玩電話

總領事館提醒國民喺香港要睇實行李，隨身物品盡量跟身，尤其喺人多地方，例如機場、鬧市、景點及商業設施等，又建議將手袋斜孭喺馬路嘅相反方向，仲要保持喺視線範圍內，如果身處人群中，更應該放喺自己面前，而護照同銀包等貴重物品就應該分開擺放；最後係避免一邊行一邊用智能電話或聽音樂，以免未能察覺周遭環境。

全面通關後，好多港人外遊，其實領事館嘅提醒對港人都好適用㗎！