【Emily】迪士尼幻想工程賽 港大生尋樹救地球掄元

【明報專訊】香港迪士尼樂園噚日公布「迪士尼幻想工程香港挑戰賽 2023」得獎名單，由香港大學隊伍拎到冠軍，佢哋將獲得喺迪士尼實習6至8個星期嘅機會，其間會由樂園嘅幻想工程師指導，仲可以去上海迪士尼交流，同埋有現金獎勵。

參賽嘅大專學生要設計多項嶄新嘅虛擬娛樂同教育體驗，今年嘅主題係於外太空構建多元共融嘅人類社區，並實行環境保育。冠軍隊伍設計嘅故事，係當地球變到無法居住，人類要搬到人造星球，開展尋找一棵巨型許願樹殘骸嘅任務，以令地球恢復原貌。亞軍就由城大學生奪得，季軍及優異獎隊伍都來自港大。

要設計虛擬娛樂同教育體驗

迪士尼樂園度假區行政總裁莫偉庭話，迪士尼將想像變為現實嘅過程叫做「幻想工程」，希望呢個比賽培育到具潛質嘅故事演說家，畀參賽者展現創意才華，獲得設計嘅實戰經驗。新一屆比賽將於6月開始接受申請。