【Emily】「百分百擔保」壞帳飈 去年逾千宗涉24億

【明報專訊】政府喺新冠疫情下推出「百分百擔保特惠貸款」，以紓緩中小企嘅營運壓力，中小企借錢首年可以「還息不還本」，對中小企固然係好消息，但根據商務及經濟發展局提交立法會特別財委會嘅文件，上年壞帳宗數佔比超過一成。上年批出超過1.15萬宗申請，涉336.3億元，壞帳就有1241宗，佔獲批申請嘅10.7%，涉款24.6億元（見表）。

壞帳佔比由1.2%升至10.7%

睇番2021年嘅數字，獲批申請有逾2.1萬宗，涉款419.4億元，壞帳有266宗，即係佔獲批申請嘅1.2%，涉款4.2億元。而該計劃自2020年4月推出至今年2月底，累計批出6萬多宗申請，壞帳有近2000宗，比例約為3.2%，累計壞帳38.6億元。

去年商品例千宗餐飲旅遊投訴 20宗可跟進 14人定罪

另外，不良營商手法嘅檢控數字一向偏低，工聯會鄧家彪喺特別財委會書面問海關最新數字，海關上年就《商品說明條例》美容、健身、裝修、餐飲旅遊4個範疇共接獲1824宗投訴，其中1042宗與餐飲旅遊有關，其次係美容，有379宗，可跟進嘅分別只有20宗和11宗，最終被定罪嘅分別有14人和6人，當中更包括較早年度嘅檢控個案。