【Emily】田北辰「三代同堂」遊京 愛上羊肉串

【明報專訊】一連四日嘅復活節假期噚日結束，唔少政界中人同市民都趁機外遊。立法會新界西北議員田北辰就與家人「三代同堂」去北京旅行，佢話當地近日天氣風和日麗，到處人頭湧湧，地鐵無論咩時間都係咁迫。自由黨前黨魁鍾國斌（Felix）就去咗歐洲，旅行之餘亦處理公事，期望喺碳排放同金融方面與當地機構合作。

田北辰話以往擔任人大代表，每年3月都要上京開會，所以好少會喺4月再去北京，而佢認為4月踏入春天，最適合遊覽京城。Emily見到佢喺facebook分享與家人合照，佢哋去咗長安街等地方，仲揸住烤羊肉串食得津津有味，佢形容係人生食過最好味嘅羊肉串。

Felix近日就去歐洲多國，其中相隔20年再去荷蘭阿姆斯特丹，佢話今次感覺「麻麻哋」，垃圾佈滿街頭，黃賭毒活動公開，甚至有司機將架車停喺路中心抹車，阻住交通。佢亦到訪多間歐洲公司討論碳中和科技以及碳信用額交易，希望能展開合作。