【Emily】蔡思貝袁偉豪幫警拍片 推廣國安教育日

【明報專訊】警方噚日喺facebook專頁上載《警聲百二秒》推廣本周六舉行「全民國家安全教育日」，片中藝人蔡思貝飾演外賣員，送外賣時發現藝人袁偉豪飾演顧客嘅辦公室，有一幅以本港地圖作背景嘅偵探板及「可疑裝置」，之後致電「反恐舉報熱線」，警員到場發現嗰啲只係無線電裝置。袁被問到呢個裝置有咩作用時，話一直嘗試聯絡外星人，認為金字塔、麥田圈可能係外星人所為，只要聯絡到就可解開謎團。蔡就問警員如果見到外星人係咪都要「見疑即報」呢，警員就話「呢個牽涉國家安全，亦係地球安全嘅問題，值得探討」。

片中袁指蔡思貝「報假案」要求警方拘捕蔡，警方話如果唔係故意濫用熱線就唔會拘捕，又話維護國安係每個國家嘅權利同國際慣例，若視而不見，「下一個受害者可能就係你」。據警方回覆2023/24開支預算數字，由2020年11月5日至今年2月24日，國安處舉報熱線接獲逾40萬個舉報；去年6月至今年2月底，反恐舉報熱線接獲逾1.3萬個舉報。

相關字詞﹕反恐舉報熱線 國安處舉報熱線 全民國家安全教育日