【Emily】青民推義工儲積分 換見官員議員

【明報專訊】青年民建聯（青民）推出義工積分獎勵計劃「青扶新希望」，參加者只要參與義工活動到一定時數，就可以兌換積分，換取同官員或者議員一對一見面嘅機會，參與官員包括副律政司長張國鈞、保安局長鄧炳強、民青局長麥美娟等。青民主席施永泰話，參加者想見官員同議員所需嘅義工時數都唔同，但暫時未定要求。

暫獲11官員9議員支持

青民副主席穆家駿話，今次計劃有別於坊間其他義工計劃，除咗探訪老人院、幫基層學童補習等，亦有政治相關活動，以至參與關愛隊服務。第一期計劃為期6個月，青民會定期搞義工活動，參加者需於限期內參與活動兌換積分，換取同官員、議員見面機會。計劃暫時共獲得11名官員同9名立法會議員支持，當中多人有民建聯背景，例如財庫局長許正宇、副商經局長陳百里、副政制局長胡健民等，施永泰話未來會繼續邀請更多嘉賓支持計劃。

計劃對象係18至35歲青年，青民希望鼓勵青年參加義工活動，並藉此認識社會賢達、擴闊社交網絡，達至助人自助。活動本周五（14日）截止報名，至今已有近50人參加。