【Emily】徇眾要求 葉太分享復活節拉筋相

【明報專訊】唔少市民趁復活節外遊，新民黨主席葉劉淑儀就選擇留港消費，日前佢去山頂行山，並喺facebook分享抬腿拉筋嘅相片（圖），一展肌力柔軟度。葉太並到警隊博物館「打卡」，話要為警隊打氣。

葉太噚日喺fb話，好多網友問佢仲有無行山拉筋，佢回應話無論工作幾繁重都會抽空做運動，又分享自己復活節時行山拉筋相，佢形容雖然未算陽光普照，但無傾盆大雨，亦唔悶熱，天氣尚算唔錯。行山途中葉太路經活化後嘅警隊博物館，佢話入口處嘅「打卡位」有趣，都停低影咗幾張相。

工聯會鄧家彪假期時就外遊，同家人去桂林旅行。佢喺fb話當地風景怡人、景點好玩，例如帶埋囝囝坐電單車，佢並一試玩滑翔傘嘅滋味，喺高空一覽群山。佢大讚當地旅遊質素高，度過咗開心同安全嘅假期。

相關字詞﹕警察博物館 鄧家彪 葉劉淑儀