【明報專訊】唔少外國駐港領事嚟到香港都鍾意品嘗地道小食，日本駐港總領事岡田健一之前試食過蛋撻，仲試齊牛油皮同酥皮兩款，今次佢就食自己好鍾意嘅雞蛋仔，仲拍埋片（圖），用廣東話：「脹卜卜咁好得意，你哋要唔要食一粒呀？」岡田先生仲即刻食一粒，睇佢個滋味樣，真係唔似扮嘅。
不過可能「一粒」嘅廣東話真係幾難發音，岡田似乎唔係好讀到，但最緊要係網民鍾意，日本駐港總領事館喺社交平台上載影片後，帖文噚日出咗7個鐘就有近500個likes、哈哈笑等。唔少網民都留言話岡田夠貼地，仲介紹佢食吓其他口味，好似朱古力、鹹蛋肉鬆等，不過最大膽嘅建議，應該係叫岡田試吓放納豆入雞蛋仔喇！
