【明報專訊】前民陣召集人陳皓桓（Figo）今年2月底出帖話拎咗特區護照，強調會去旅行，但唔會移民；最近Figo去咗旅行，同好多港人一樣於開關後即刻「返鄉下」，作為哈利波特（Harry Potter）迷嘅佢仲去咗大阪環球影城「朝聖」。
Figo話細細個就好想去城堡，著住Harry Potter件袍、攞住魔杖影番張相，有騎掃把飛吓就最好，今年生日，佢就喺朋友安排下圓咗兒時夢想，著住件袍喺霍格華茲城堡前「打卡」留念。
佢仲話，細個好多嘢想做就做，長大咗就發現好多嘢都唔係想有就有，希望大家珍惜機會，唔好忘記夢想，珍惜自由；今年生日願望就希望自己同大家都可以平安快樂健康。
