【Emily】特首辦：宣傳開支無獨立帳目

【明報專訊】立法會就快會審議財政預算案，政府唔同政策局近日陸續回覆議員有關來年開支預算嘅查詢。Emily留意到，作為特區之首嘅行政長官辦公室，舊年同今年各得一個議員提問，連續兩年都係收到最少問題嘅部門之一，今年議員仲問唔到想要嘅答案。

今年提問嘅會計界黃俊碩問特首辦，舊年七一至今宣傳公關方面嘅開支，包括社交媒體宣傳品、短片製作、社交媒體廣告等，同埋今年度有無打算增宣傳開支。特首辦常任秘書長鄭鍾偉回覆話，政府重視宣傳及推廣工作，但特首辦無就宣傳公關開支設獨立帳目，即係提供唔到相關開支。

21學員退出共創明Teen

政府舊年推「共創明Teen計劃」幫初中生擺脫跨代貧窮，行政署長回覆議員話，截至今年2月底共2779名學員參加，21名學員主動退出，原因包括學業繁忙、與學校活動或課外活動撞期，同埋周六周日要參加補習班等。

行政署長話，截至今年2月底共2779名友師參加計劃，26至40歲最多，佔1438人，即佔整體逾半，友師包括醫生、律師、會計師、教師、董事、部門主管、銀行經理、立法會議員等。