【Emily】中西區未婚比例全港最高 離婚分居率深水埗居首

【明報專訊】統計處早兩日公布2022年各分區人口統計數字，除咗唔少人關注嘅收入分佈，仲公布咗各區從未結婚、已婚同離婚人數及比例。其中「從未結婚」嘅數字應該最受關注，Emily睇番啲數，15歲及以上從未結婚單身男女最多嘅係觀塘區，有17.8萬，其中9萬多係男性，8.7萬係女性；至於人數最少嘅係灣仔區，有4.2萬，女性就佔近2.6萬。

全港多9500人離婚分居

觀塘最多單身 灣仔最少

如果按當區總人口比例計，中西區嘅從未結婚比例最高，有32.3%嘅人從未結婚，當中以女性佔多；其次就係黃大仙區，31.9%當區人口從未結婚，但就男性佔多。

對比2021年嘅數字，部分地區從未結婚嘅人口有所增加，包括南區、北區、西貢、深水埗、葵青及屯門，其中以南區增加得較多，多咗超過兩萬。

至於離婚方面，舊年全港報稱離婚或分居嘅人有39.3萬，比對2021年多咗9500人，其中離婚比例最高嘅地區係深水埗。不過，根據司法機構噚日回覆立法會財委會過去5年嘅數字，向家事法庭入稟離婚嘅個案數目，自2018年一直下跌，由2018年嘅近2.3萬宗，跌至上年1.65萬宗。