【Emily】民主黨低調飯局 泛民聚一聚

【明報專訊】民主黨原定2月舉行春茗，惟預訂嘅酒店同酒樓連番以「緊急維修」等不同原因沒接生意。民主黨繼早前變陣與核心成員「小圈子」擺兩圍，日前亦低調邀請民主派友好飯敘，該黨前主席劉慧卿上周五（31日）就喺facebook發布相片，見到佢同黨主席羅健熙一晚「走兩場」，出席者包括社民連主席陳寶瑩同成員曾健成（阿牛）、教育界前議員葉建源等。

卿姐喺fb話「感謝朋友和黨友出席民主黨晚宴」，佢同Emily講，今次飯局由黨領導層牽頭，主要都係想相約民主派友好食飯相聚。

春茗一波多折 卿姐不忿稱荒謬

對於之前民主黨春茗一波多折，卿姐直言「好不忿」，話唔明白點解預訂嘅場地接連出事，批評情况荒謬，慨嘆食餐飯都有困難實在好離譜。

與羅健熙走兩場 葉建源陳寶瑩出席

由相中可見，民主派不同光譜都有人出席，包括立法會前議員葉建源、社民連陳寶瑩同曾健成、屬民協嘅黃大仙區議會前主席許錦成、觀塘區議會前主席蔡澤鴻、油尖旺區議會前副主席余德寶等。民主黨亦有多名成員出席，包括中委吳永輝、莊榮輝、朱子洛、梁永權，深水埗區議員袁海文等。