【Emily】史立德：內地省市報復式訪港招商

【明報專訊】新冠疫情期間，好多廠商叫苦連天，廠商會會長史立德噚日見傳媒時，話香港同內地全面通關後，被問得最多嘅問題係：「訂單返來未？」佢就話訂單真係未返到，「荷包縮晒水，要留番啲錢」，好多海外客戶落單時都比以往保守，部分買家甚至仲消化緊舊年存貨，但佢相信下半年應該有轉機。

廠商會籌備年內訪京

通關嘅好處，包括廠商會可籌備訪問北京，暫定今年內成行，實際日子待定，希望此行可以向中央部門反映業界關注嘅議題；廠商會下月18至22日又會去馬來西亞同新加坡，探討合作商機，之後都會同品牌發展局喺其他大灣區城市舉辦展覽會。

史立德又提到，近兩三個月內地各省市「報復式」訪港招商，帶動市場氣氛，廠商會都同駐港領事、商貿代表聯絡，所以對香港前景依然樂觀。

史立德3年任期餘下9個月，任內正值疫情，但佢話廠商會工作無停過，如今疫情過去，除下月初喺澳門舉辦工展會，亦會於7月、8月、10月同12月有大型展覽，包括教育及職業展、工展會購物節、美食嘉年華同工展會。