【Emily】泰議會團訪立會 盼港加快批廚師簽證

【明報專訊】通關之後，唔少外地訪問團重返香港，立法會噚日就接待咗泰國國民議會上議院代表團，包括佢哋嘅勞工常務委員會，同埋信息技術、通信及電信常務委員會兩批議員。工聯會梁子穎透露，會上泰國議員關注香港嘅泰國餐廳想請泰籍廚師，但簽證審批都要等9至12個月。

梁子穎：勞處唔夠人 疫下個案積

政府目前平均簽證審批要等約5個月，梁子穎認為最大問題係負責審批嘅勞工處本身都唔夠人，疫情後又積壓個案。泰國議員又關注，目前在港泰傭可唔可以轉職做其他崗位，不過梁子穎話，受外傭相關條例規範，轉職就比較困難。

有份見另一批泰國議員嘅選委界別議員陳紹雄就話，代表團對港府推行「人臉識別」非觸式自助出入境檢查服務感興趣。佢又話，泰國議員今次加深了解咗香港智慧城市發展，又話歡迎立法會去泰國訪問，進一步加強雙方關係。