【Emily】假論壇海報用林鄭相 前任特首辦報警

【明報專訊】網上詐騙信息氾濫，Emily留意到，有報稱係港股情報嘅社交網站專頁，最近用前特首林鄭月娥嘅相做招徠，話下個月搞所謂「高端教育論壇」，主題包括「碳中和」、「環境、社會和管治（ESG）職業規劃」等。前任特首辦回覆Emily查詢時話，有關活動係虛假消息，上個禮拜已轉交警方跟進。經查詢後，相關專頁同網上信息都再登入唔到喇。

根據該「論壇」海報，其他聲稱有嘅嘉賓包括報章創辦人之一石鏡泉、測量師邵志堯等。邵志堯就喺facebook慨嘆話，海報中嘅人名係真、協會名係真、地點都係真，但成個活動係假嘅，自己唯有阿Q啲咁睇，高興「被安排」到同前特首林太一齊「出席論壇」。Emily睇番資料，特首李家超、政務司長陳國基、財政司長陳茂波等官員都試過被盜用相片，用於網上詐騙廣告。

相關字詞﹕林鄭月娥