【Emily】收200無家動物 兩棲爬蟲協會籲領養

【明報專訊】一講棄養，好多人都會諗起貓狗，其實被棄養嘅仲有守宮同烏龜呢啲兩棲及爬蟲動物。漁護署轉交動物領養計劃嘅伙伴機構香港兩棲及爬蟲協會，現時飼養約200隻動物，一半係被檢獲嘅非法入口動物，例如科學館「親親兩棲爬行動物生物多樣性工作坊」動物大使藍舌石龍子Mojito；另一半係被遺棄街頭或棄養。協會鼓勵市民領養動物，希望飼養者願意照顧寵物到終老，唔好棄養。

前主人懷孕棄養 守宮「Blue」尋家

對於曾被遺棄街頭或棄養嘅兩棲及爬蟲動物，協會領養部幹事黃朗研舉例，睫角守宮Blue因前主人嘅另一半懷孕而被棄養。佢話睫角守宮或只有十幾年命，生命過咗一半或三分之一時被迫改變生活環境，對佢哋非常唔好。佢話雖然覺得好可惜，但正面睇，棄養者將佢交畀協會而唔係遺棄街頭。黃朗研話，好多動物老咗就遭遺棄，「對佢哋並不公平」，提醒有意養寵物嘅市民，不但要考慮屋企環境，仲要諗吓未來規劃中有冇呢隻動物嘅位置。

相關字詞﹕領養不棄養 領養動物