【Emily】梁美芬立會派曲奇 盼齊為劏房童打氣

【明報專訊】兔年就到，經民聯立法會議員梁美芬噚日送咗兩盒兔年曲奇餅畀一班議員食，但原來內有乾坤，盒入面除咗有大型兔仔曲奇同瓜子之外，仲有一張寫住「精準扶貧告別劏房」嘅卡。梁美芬喺facebook話，呢個係由佢有份發起、協助100個劏房小朋友嘅「凝聚民心」工程推動嘅創業計劃，佢哋喺蘭桂坊一個焗餅工場，焗咗200盒大型兔年曲奇餅，噚日特登送兩盒嚟，話希望議員一齊為劏房小朋友打氣，等佢哋盡早告別劏房。