【Emily】女性文物展 有唐伯虎畫睇

【明報專訊】香港文化博物館搞咗個《眾裡尋她——南京博物院藏中國古代女性文物展》，有118組來自南京博物院嘅古代女性文物珍藏，其中21組國家一級文物係首次在港展出，包括唐伯虎嘅《李端端落籍圖》，作品描繪唐代詩人崔涯同名妓李端端嘅軼事，聽講崔涯曾經寫詩取笑李端端皮膚黑，後來李端端親自拜訪求佢重寫。唐伯虎將自己比喻做崔涯，題詩暗示自己雖然窮酸，但喺名利場中獨得佳人青睞，曲折又狂傲咁表現自我。