【Emily】疫下多咗新人搞酒會 「人情」中位數600加到800

【明報專訊】呢牌大家收到「紅色炸彈」會諗畀幾多錢「人情」？有調查發現，因應早前政府就防疫規定處所設人數限制，近年多咗新人搞酒會，人情中位數亦由上年600元升至今年800元，加幅超過三成；至於「邀請出席於婚姻註冊處或教堂嘅簽紙儀式」人情中位數更由上年300元，大升66%至今年500元。有唔少新人都揀喺高級酒店擺酒，人情中位數連續3年維持喺1500元水平；而喺一般酒店、私人會所及特色婚宴場地，人情亦維持喺1000元水平。